(عواد باع ارضه يا ولاد على طوله وعرضه يا ولاد)
اغنيه قديمه كانوا بيزفوا بيها الى بيبيع ارضه او بمعنى ادق واصح بيجرسوا بيها وبيفضحوا الى بيعمل العمله المهببه دى ........
مهوا كان زمان الأرض عرض والعرض غالى اما دلوقت فالارض والعرض بقوا ارخص من الهوا .......
ماهوا اصل الكل بيبيع دلوقت والغريب فى الموضوع ان الى بيشترى هو الغريب .... لحد ما في يوم حنصحى نلاقى نفسنا عيشين على ارض مش ارضنا .....عيشين بالأيجار...... وايجارها حيكون دمنا وعمرنا
وساعتها يا ترى ايه الى حيكون اغلى ؟؟؟
دمنا ولا الثمن الى بعنا بيه ...هه؟
عموما نسبنا من المقدمات الى كلها تلميحات سياسيه دى عشان الكلام فى السياسه ده كلام كبير قوى علينا وخلينا فى الكلام الى على قدنا ...الحكايات ......
وفى الحكايات زمان زمان كان فى راجل اسمه عواد ويمكن يكون حد منكم سمع حكايته زمان فى الراديو .........وعواد ده قلنا انه لما باع ارضه انفضح واتجرس والكل زفه وغنوا الاغنيه المشهوره ( عواد باع ارضه يا ولاد )
وانا بقه ححكى حكايه عواد الزمن ده
عواد الى كان شئ عادى جدا جدا انه يبيع ارضه والى ملقاش حد يرده لعقله ويقوله عيب يا واد تفرط فى ارضك ...دى الارض عرض يا وله ...شرف يا وله ...بل كان الكل يدفعه دفعا للبيع قائلين : هى الارض يعنى كانت عملتلك ايه ولا حتعملك ايه؟؟؟....بيع.....بيع وكأنها حملا ثقيل على اعناقهم ..
بس انا احكى ليه !!!!!!....طب ما اسيب صاحب الشأن هو الى يحكى طالما هو حى يرزق .......اه حى ولله الحمد اما يرزق منين بقه ؟!...فالله اعلم!!!!!!
ولكنه موجود ويقدر يحكى احس منى .......تعالى يا عواد .....تعالا احكى انت حكايتك بنفسك .......متتكسفش... هو بيع الارض بقه بيكسف........ بالعكس ده احنا بقينا مطالبين بيه كلنا..........عادى يعنى
عواد : اجول ايه يعنى؟
- احكى حكايتك وخد راحتك خالص.
- ابدأ منين؟!
-من الاول ......من اول ما بعت ارضك .....لحد انهارده ...وبكره .....وبعده ......
- ههههههههه ....مذكراتى يعنى ......
- ايوه كده بالضبط
- اه بس محدش حيغير فيها ....ولا يمسحلى كلام ولا يجولنى كلام مجولتهوش ....هه ....حكم يعنى انى فلاح _حتى لو من غير ارض_ بس برضه انى فلاح والفلاح واخد على البراح ....ولسانى لما بينطلج فى البراح ده مبيسرجهوش لجام .....يعنى بحب ابرطع زى مانى عاوز ...هه ....يعنى حجول الى فى نفسى كله وكل الى بيجى على بالى ... وعايز اضمن ان كلامى مش حيعدى على رجابه ولا دياولوا ...هه ايه رأيك بجه ؟؟؟
- رقابه ايه يا عواد......... ايه الكلام الكبير ده ...........
- يعنى ايه كلام كبير.؟؟؟؟ هو في كلام كبير وكلام صغير!!!!!........ الكلام كلام ....وطالما الواحد مخه مساعده ولسانه مهاوده خلاص يجول ما بدا له هو الكلام بفلوس ولا عليه راخر جمرك ........بس هو الخوف دايما من الرجابه..
- رقابه ايه بس ...مين بس قالك ان حيبقى على كلامك رقابه ...
- بصى يا ست....... الدنيا دى كلها رجابه فى رجابه الكل بيراجب الكل
ماهو اصل ساعات بيبقى فيه كلام المفروض انه يتجال ولا بيتجلش وكلام تانى بيتجال والمفروض انه ميتجلش
يعنى مثلا الست دندش حرمنا ماهى رجابه عليا ...فى حاجات بيبقى نفسى اعترض عليها اوجولها بس مش بجولها وحاجات بجولها واكتشف انى مكنش لازم انطجها حتى وبرضه الناس الى بعمل لهم شغل
والناس الى بتعامل معاهم
والناس الى دايرنا ودايرين البلد كلها
الكل بيراجب على الكل والكل متراجب من الكل
يعنى مثلا مش احنا جوه مكتب من جوه مبنى سمنت اهو..... بس ممكن يكون الجمر الصناعى جايبنا دلوكت ....اه مستغربه ليه؟؟؟.............ويمكن بيسمعونا كمان ويسجلولنا........مش ممكن برضه يا ست ...ولا ايه ؟؟؟
- والله يا عواد .....ممكن ...........بس انت بتقول كلام حقيقى مكنش متوقع منك خالص ..عموما الى فهمته منك انك عاوز تتكلم براحتك .....صح
- صح
- قول كل الى فى نفسك ..............ومفيش رقابه
- مع انى مش مصدج حكايه ان مافيش رجابه دى ........بس ماشى ما دام مفيش رجابه ............يبجى حجول وحاسيب لسانى ينطلج ويبرطع...
_ يتـــــــبع _
